Plantun de Prouvènço

Pèr coumpara dos planto d'encò nostre

Cardamine resedifolia & Plumbago europaea

Cardamine resedifolia

Brassicaceae Cruciferae

Nom en français : Cardamine à feuilles de réséda.

Descripcioun :
La cardamino-à-fueio-de-sounaioun es uno pichoto planto que se rescontro dins li roucas, lis esboudèu e li pelouso de mountagno séusouso. Se li fueio de la baso soun souvènt entiero, aquéli de la tijo soun descoupado e un pau espesso. Coume proun de cardamino a ges de péu. Apoundèn que li silico soun en generau drecho.

Usanço :
Èi bessai uno planto manjadisso coume lis àutri cardamino, mai avèn ges d'entresigne segur. Escriéure au site se n'en sabès mai.

Port : Erbo
Taio : 3 à 15 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Cardamine
Famiho : Brassicaceae
Famiho classico : Cruciferae

Ordre : Brassicales

Coulour de la flour : Blanco
Petalo : 4
Ø (o loungour) flour : 4 à 6 mm
Flourido : Printèms - Estiéu

Sòu : Si
Autour basso e auto : 1700 à 3300 m
Aparado : Noun
Mai à avoust

Liò : Roucas - Esboudèu - Pelouso
Estànci : Mountagnard à Aupen
Couroulougi : Ouroufito-Éuroupenco
Ref. sc. : Cardamine resedifolia L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.